第九場三班1600米，博ＷＰ一早決定「巨無霸」，雖然今季跑兩場都一般，但經過埋門連續六課拍跳打磨後，覺得狀態正式到位，雖仲可以再好，但已覺夠贏。
「勁嘉輝」乃另一買Ｑ必揀的實力馬，鍾意佢小休復出，兼有一檔，均速馬有內檔幫不必留太後，威力會強得多。
再揀，「歡樂盈盈」暫看也是另一均速馬，上仗靠賺檻到平頭第二，今次一樣有權再賺。「萬馬飛騰」換人，最重要是終肯除眼罩，近兩場有眼罩一起步就留唔到，仍未睇到最好的一面，復課無戴眼罩，大圈、草地各拍一課，都見勁而不急，外檔都照揀。
「英才」跑法會賺，只覺準而欠突破，買Ｔ才諗。「尊兄」連續贏兩場，換人唔信。「皇牌」外檔多數又要蝕。「紅駿」近仗差。「行善積福」朝早試跑無氣勢。「劍凌雲」欠進。「寶正寶」超輕磅，外檔焗搶怕埋唔到尾！「明目張膽」及「經典帝國」上班轉一哩考驗大。策略：3博ＷＰ，Ｑ1，3，8，10互串。