堂堂英格蘭一號門將，赫特去那兒？30歲嘅赫特去季未獲曼城領隊哥迪奧拿歡心，更被外借至意甲拖連奴一季，協助球隊以聯賽上半版第9位完成球季，雖然赫特同拖連奴會長上月尾已經先後透露口風表示買斷交易唔會成事，但外界仍然揣測呢支都靈球隊有可能成為呢位「三獅」門神嘅下一站。

不過，拖連奴周二宣佈，由法甲巴黎聖日耳門（PSG）免費簽入前意大利國腳門將沙華托尼施利古，可謂正式封赫特後門。30歲嘅施利古曾經17次為意大利國家隊把關，佢自2011年效力PSG，但過去一季不受重用，先後外借西維爾同奧沙辛拿，最終未能挽救後者降班。至於赫特面對曼城現有哥帥契仔哥迪奧巴禾同新簽全球最高身價門將艾達臣摩拉斯競爭，幾乎唔使旨意返「藍月」，盛傳韋斯咸有意出手羅致。