【《造星》十強】MC化悲憤為力量 誓報亡父支持爭番啖氣
ViuTV全民造星
ViuTV人氣節目《全民造星II》於周日假邵氏影城舉行總決賽,14號吳啟洋(Phoebus)、20號李祉均(Oscar)、24號曾比特(Mike)、28號張天賦(MC)、29號梁德忠(Tank)、38號范卓言(JJ)、69號阮頌揚(Brian)、74號歐鎮灝(George)、82號丘凱雄(Hugo)和95號陳樂(Justin)將進行十強大戰,比賽戰事一觸即發。今年賽制由評判團及全民投票各佔一半評分,日前《蘋果》找來MC、Tank和Mike,以不同形式進行拉票,MC用rap,他希望大家用尖叫和心跳來投他一票,而Tank事先張揚當晚會有辣身演出,Mike則以搞笑輕鬆形式出賽。
一直被視為大熱的MC,數年前由外國讀完書回港後,經常在街頭busking,他笑說:「喺尖沙嘴、旺角、銅鑼灣busking,當時都搵到兩餐,但之後就越嚟越差,因為越嚟越多人玩呢樣嘢,跟住我就搵其他兼職,睇吓有冇機會被人發掘到,我當時嘅目標係想多啲人認識我,因為我鍾意唱歌。」自從上年ViuTV推出《全民造星》,MC在朋友鼓勵下,再加上為了當時患病的父親,決定參加《造星II》,他說:「我細個好反叛,除咗小學攞一啲獎項之外,我人生都冇乜成就,一無是處,其實屋企大部份人都好反對我唱歌,覺得我應該要腳踏實地,但唯獨是爹哋會話『你鍾意做就去做』,當時我諗不如做啲嘢畀爹哋睇,唔好辜負佢期望,又有咁多朋友鼓勵我,於是我的起心肝去參加,好彩入咗圍。」
參賽的這段日子,相信是MC最刻骨銘心、最椎心之痛的日子,MC說:「嗲哋之前都有keep住問我比賽成點,叫我加油,喺99強自選表演,屋企人都有睇到,原本反對我嘅佢哋,都覺得我唱得幾好,喺爹哋心目中係好開心,因為爹哋成日聽到喺親戚口中嘅我係唔生性、淨係發明星夢,今次都叫上過電視,雖然未有咩成就,但爹哋覺得我起碼爭番啖氣,叻番次畀姑姐佢哋睇;即使爹哋好辛苦,佢都會煲湯畀我飲,好窩心。」MC說到亡父的默默支持,忍不住眼泛淚光。
《造星II》監製花姐曾表示今次將有跳唱指定環節,向來不擅長跳舞的MC直言已預計會被扣分,所以會在另外兩個環節中力爭最好的表現,有否想過向冠軍進發,做姜濤接班人?MC說:「姜濤接班人,我唔敢去諗,但係我參加得比賽,梗係向冠軍進發,我想入行,我想唱歌,我想畀更多人知道有MC呢個人,同埋想證明畀屋企人睇,即使我唔係搵好多錢,但呢個起碼係我一個成就,我唔係淨係發明星夢。」
經常為不同藝人擔任演唱會舞蹈員的Tank,他坦言入行時原意是不想只做舞蹈員,「之前參加過《脫獨工程》,但之後冇乜機會,後來有《全民造星》,我覺得係一個機會,因為我想拍劇、拍戲。」可惜去年參加《全民造星》時,因為要擔任張學友演唱會的伴舞員,所以只好退賽,今年再戰《造星II》繼而追夢,他說:「其實話有《造星II》嘅時候,我有諗過唔參加,因為我好介意人哋對我嘅睇法,話我靠關係,好老實講,我有咩關係呢?我識嘅人又唔係有錢、最大粒嗰啲,我識佢哋(組合MIRROR),佢哋係咪真係有能力去幫我呢?同埋話我唱歌唔好聽,其實我有跟老師學,但我學唔到係心理質素,我遇到緊張,揸住支咪都會出手汗同手震,可能自己知道呢個係缺點,所以我總決賽唔可以齋跳舞,所以之前有一個『專業大獎』環節,我選擇唱歌訓練自己嘅心理質素,所以我而家對總決賽有信心。」覺得自己是三甲之列?Tank說:「我係朝住冠軍方向,當然條路係好難行,對手又強,佢哋有實力之餘,仲有觀眾緣。」其餘9位對手可有地方需要改善?Tank指Oscar跟他一樣,在唱歌方面要加倍努力,「佢有樣貌,有身形,佢都係爭唱歌,佢唱歌好過我,冇我咁嚴重,佢爭少少就係一個近乎完美嘅藝人。」
本身是音響技術人員兼唱歌老師的Mike,曾經參加過坊間不同的比賽,加上看過上年的《全民造星》,於是決定今年參加,期望可以加入演藝圈,Mike笑說:「當時喺公司發吽哣諗咗好耐,報唔報名好呢?跟住就報咗。」在多個回合中,Mike被讚唱歌好聽,可惜花姐曾表示考慮將Mike加入組合ERROR,Mike說:「刺激吖!我形象偏向有喜感,有時我跳舞,大家唔會集中睇我跳舞,其實我入嚟玩咗咁耐,大家對我嘅評語係『好搞笑,好幽默』。再加上花姐成日話我『唱歌真係好好,但真係好唔靚仔』,所以我覺得ERROR更加適合我。」能否做到姜濤接班人?Mike說:「姜濤就係姜濤,我就係我,我哋風格都唔一樣。」周日就是決戰之日,Mike表示已想好做之前未曾做過的表演,是一個特別嘗試,Mike坦言10個兄弟中,大家都各有長處及短處,「當Tank唱歌唔好聽,大家去到呢一刻都會互相幫助,我覺得呢個團體好有愛,雖然大家好快要廝殺,廝殺過後,大家都係朋友,而且我哋覺得呢場係我哋10個嘅一場騷。」
-----------------------------
《2019高級珠寶鑑賞誌》
點擊即睇過百款鑽飾名表 -----------------------------
【匿名港警爆大鑊】
韓國KBS時事節目《時事直擊:香港 被自殺》
一按即睇 ViuTV人氣節目《全民造星II》將於周日假邵氏影城舉行總決賽。
日前《蘋果》找來MC、Tank和Mike,以不同形式進行拉票。
一直被視為大熱的MC,家中只有爸爸支持他追歌唱夢。
在比賽中途MC父親因病過世,MC希望為爸爸爭一口氣。
經常為不同藝人擔任演唱會舞蹈員的Tank,坦言入行原意不是舞蹈員。
Tank說:「我係朝住冠軍方向,當然條路係好難行。」
本身是音響技術人員兼唱歌老師的Mike被讚唱歌好聽,但外形卻被彈爆。
Mike坦言10個兄弟中,大家都各有長處及短處,但大家會互相支持。