來到6月，每位準備踏入社會的畢業生都開始尋找心儀的工作，但要爭取職位需要過五關斬六將，而第一關見工面試寫CV，就難到不少畢業生。有見及此，《青雲路》在6月尾舉辦《職場大贏家》免費講座，找來在人力資源服務公司Adecco擔任市場推廣及傳訊部高級經理的Mei（馮源美），分享見工事前準備技巧，讓各位有興趣人士可以從中充實自己。

Mei表示每逢臨近畢業季節都是工作較忙碌的時候，她經常要出席一些有關職場講座擔任演講嘉賓，每次演講也是她親自準備內容。「大公司每次招聘都收幾百份CV，據我哋收集嘅數據，HR平均只會用15至30秒時間去睇一份CV。所以點樣寫好份CV，從而增加進入面試嘅機會，當中係會有技巧，例如因應招聘廣告中嘅job duties寫番keywords落CV度，會有助增加入選面試嘅機會，我會喺講座上再詳細講解。」

另外，Mei表示見工面試在寄出CV時已經要開始準備，「唔少畢業生會寄好多CV出去，但最好要記得寄過去乜嘢公司，及申請乜嘢職位，唔好到時對方嘅HR通知你去面試時，先問係見乜嘢工。面試前，求職者要對公司嘅業務範疇、求職職位嘅工作，做好資料搜集，呢啲會係面試官嘅熱門問題。」

建立公司形象
Adecco是一間人力資源服務公司，提供長短期人材招聘、外判僱傭、顧問諮詢及員工轉職就業等服務，Mei身為市場推廣及傳訊部高級經理，她的職責是讓更多人認識公司的服務及幫助建立公司的形象。「對內時常要與業務發展及sales等唔同部門開會，了解公司嘅發展方向，然後作出配合，籌辦講座、網上宣傳、擺展覽等唔同活動，要與各部門同事去溝通；另外，對外要與傳媒打交道，安排訪問及發新聞稿等，成日要周圍走。」

修讀商業管理的Mei，在04年畢業後便加入了市場推廣界，「畢業時，我未有目標，喺網上見到一間電子產品公司請marketing，就去做住先。初時我唔知marketing要做乜，要請教資深嘅同事。原來有好多對內對外嘅溝通工作，當時公司會周圍擺展覽，我要向客戶介紹產品，要熟悉產品嘅資料，同時亦要收集數據，以便定下之後嘅宣傳方向，說服其他部門嘅同事一齊合作，慢慢鍛煉溝通技巧。」

完成活動有滿足感
其後Mei去過珠寶公司、私家醫院等不同類別的公司，擔任市場推廣的工作，「本身唔係一個太有自信嘅人，亦唔了解marketing嘅工作，但做耐咗呢行，工作上需要你對客、唔同部門嘅上司名及同事，令自己對答及溝通有自信咗，而工作會接觸到唔同嘅人，唔會太悶。加上成功完成一個project或活動，會幾有滿足感，於是想繼續喺marketing呢行發展。」

12年，Mei加入Adecco，擔任市場推廣及傳訊部經理，「剛加入時，咁啱部門內嘅舊同事已經離咗職，成個部門得我一個，要做任何工作都要靠自己去摸索，睇番舊同事嘅工作紀錄，又請教其他部門嘅同事，慢慢開始上手。」

第一次演講心勁怯
在眾多的工作當中，Mei表示有機會主持講座是讓她感到新奇的地方，「不時會有公司、學校等機構，搵我哋公司合作舉辦有關職場及求職嘅講座，我哋會派同事去主持，有次就派咗我去做代表。第一次對住成百個陌生人講嘢，我個心真係好怯，惟有做足事前準備，減少出錯機會。去到𠵱家已經主持過三十幾場講座， 雖然主題大致都係圍繞招聘及面試技巧，但每次我都會重新準備講稿，希望帶畀聽眾唔同嘅角度。」

16年，Mei獲晉升為市場推廣及傳訊部高級經理，她表示在工作上希望幫助到公司發展，「會配合𠵱家數碼化嘅趨勢，數碼化各個步驟，例如用iPad畀應徵者填form，優化搵工app等。自己希望事業可以更進一步，從而有機會參與更多有關公司商業決策嘅事宜，接受更多唔同嘅挑戰。」

後記︰ 求職歲月
在與Mei討論求職面試前要作甚麼準備時，同時勾起了記者剛在學院畢業，那段辛苦的求職歲月，在興趣及薪金兩者中，挑選了興趣從而成為記者。雖然做到今天還是默默無聞，發達無望，但工作的快樂亦令我無悔當時的決定，於此亦祝願各位畢業生最終都找到自己無悔的工作。

搵好工，即上 http://www.ecjobs.com.hk