發哥今日去咗廣州華南理工大學出席《寒戰II》座談會，會上有唔少學生都關心發哥變瘦嘅問題，發哥笑住話：「最近成日跑山，自己因為借貴利，跑到瘦晒。」有學生問發哥點解瘦咗咁多，發哥就話自己o依家習慣慢步半小時去做運動，仲喺台上示範點做個動作，仲話自己會緩步跑半小時：「不過如果大家心跳快的時候就要慢一點，太快就受不了。」

而發哥喺做座談會之前受訪時話自己o依家轉行搞健身：「o依家專注照顧自己嘅身體為主，有嘢咪做囉，冇嘢咪暱埋喺山窿度過一日。」佢又補充話搞健身即係做好多運動：「我o依家嘅正職係做運動，做清道夫，清理身體裏面嘅一啲垃圾，又會練內功，逼番啲死氣、汙泥等出嚟，呢啲樁打得好深。」

問到佢係咪有舊患？發哥笑言要放粒原子彈落去先爆得開：「嗰啲嘢黐住啲骨，全部都係一嚿嚿咁，要用真氣頂番佢出嚟，都要經過一段長時間嘅訓練。」再問發哥係邊度唔舒服？佢自嘲「全部都係自己攞番嚟」：「自己扮瀟灑，幾廿年單手揸槍，揸到甩晒骹，其實都幾大工程嘅，不過個車架都仲得，執番好都見得人嘅，但o依家係大工程嘅維修，好難除衫畀你睇，呢啲垃圾睇唔到，有苦自己知。」