鄧達智（William）同同性醫生老公陳梓欣（Clement）、梁小冰、葉童、陳志雲等，今日去到灣仔演藝學院欣賞舞台劇《沙漠女皇巴士團》。

恩愛到場嘅William同Clement講到就快中秋節，佢哋打算會喺香港過，William話：「之前有朋友送咗一晚酒店畀我哋，諗住中秋用，仲會約一班朋友食飯一齊過。」William仲自爆老公送咗部iPhone 8 Plus禮物o氹自己開心，問William有乜嘢回禮？William即刻作狀啜咗Clement一啖，睇落仲好似熱戀中嘅情侶咁，冧到暈！

William補充話：「嚟緊會好多旅行，出年會去挪威同冰島行山，6月喺英國行禮，中間會去日本同以色列。」問到佢哋會唔會領養小朋友？William即刻話：「千祈唔好！屋企好多小朋友，我好錫啲姪仔同外甥。」Clement仲即刻爆William係個大細路，William笑話：「佢湊我湊得好辛苦。」