香港仔洛陽街珍寶商場，經常因爆喉引致水浸，商戶稱三年來共發生十多次，早前更出現連續三天水浸，生意大受影響；商戶不滿管理公司稱水浸乃喉管老化所致，卻遲遲不徹底維修。管理公司則指業主立案法團拒絕保養，法律界人士指若法團「明知要去做但唔去做」，或會構成疏忽責任，租戶可控告法團，提出索償。

「三年以來十幾次，唔知重要忍到幾時！」於珍寶商場經營時裝飾物店三年的黃太，向記者細訴水浸經歷，苦不堪言。

每次水浸首當其衝
黃太歎道，該商場地庫每次皆因爆喉至水浸，由於渠口跟其舖位相當接近，當每次水浸，其店即首當其衝。
她續稱，三年來已發生十多次，上星期更連續三天發生三次水浸，在日間發生的，商戶還可以「執起晒啲貨」以免弄濕；但有一次發生於凌晨四時，其間沒人發現亦沒人通知，至翌日十一時商戶開舖時才被眼前「畫面」嚇呆。
「至少浸到幾吋高，浸足七、八個鐘，地面啲貨全部濕晒！次次都嘥幾千蚊貨，重要整地板；嗰啲係血汗錢嚟㗎！成日話渠管老化，又唔徹底更換；咁落去唔係辦法！」
在該商場地庫經營童裝及精品店的王小姐亦埋怨說，「日頭水浸冇生意做，凌晨嗰次就浸到音響、地氈同貨物壞晒，成萬幾蚊呀！」
王小姐稱，她三個月前才租下兩個舖位，斥資數萬元裝修粉飾，霎眼間便化為烏有，「聽其他租戶講，呢度成日都係咁，最嚴重嗰次重浸到上膝頭！最慘我事前唔知，一早知就唔租啦！」
記者到現場了解，商戶無不怨聲載道，直斥商場漠視問題，「無正式交代，又唔肯全面維修；發生事嗰刻竟然唔即時派人嚟睇，重話唔關佢哋事！三催四請先肯到，呢啲係乜嘢管理！」