長實地產（1113）大埔嵐山2期入伙，資深驗樓師詹濟南「詹sir」驗收一個地下花園單位，實用800方呎，另連1,108方呎花園。詹sir指交樓馬虎，事關全屋10個窗，7個窗鎖螺絲蓋竟然無裝。詹sir話，雖然呢啲螺絲蓋只是價值兩、三蚊，但都唔係裝漏㗎。雖然唔涉及咩結構問題，但「偷懶」囉！

廁所及廚房牆身瓷磚出現多處空心，其中廁所兩幅牆，一幅全部空心，另一幅一半空心。主人房及走廊亦發現地板空心，呢一堆空心磚都需要重鋪，否則容易爆裂。主人房露台地板舖得差，搞到積水，應該要挖起鋪返斜少少，唔係去唔去水。另外，廚房兩個電掣不通電，插隻手指都電唔死。

詹sir總結：「單位夾埋有11張紙嘅瑕疵問題，瓷磚0分，因為真係好多空心。窗、門好見崩花甩漏，假天花有處裝得差，係石材較高分，批盪亦滿分，總分60分，對比去年入伙的嵐山1期，都係差唔多。呢個屋苑1、2期好少漏水的情況，主要是多空心磚，其他業主入伙個陣至緊要敲清楚啲瓷磚，同埋試清楚啲趟門，之前1期好多趟門都是離哂隙，搞到每逢起風，就呼呼聲。」

如果對比近期同系入伙盤將軍澳緻藍天，詹sir話：「一樣，都係咁上下，無厚待到啲業主，亦無待薄到。」

長實發言人回應，上述單位業主已於本周一(25日)遞交執修清單，本公司會派員聯同承建商到單位視察確認及作出合理跟進。



記者：陳家雄