37歲嘅羅志祥（小豬）一連兩場「2016 Show Crazy World世界巡迴演唱會—香港場」前晚機場亞洲博覽館結束，聖誕節連續兩晚，羅媽媽力撐愛兒，梁小冰都有到場喎！

聖誔節開騷嘅小豬自爆前一晚凌晨兩點幾，同一個朋友學廣東話急口令，演唱會上，小豬就乘機露兩手，仲用半鹹半淡嘅廣東話問大家拆咗禮物未？「一個個來，我聽不到。吓？沒禮物是因為來看我？那我怎樣回答？多謝囉，就用演唱會當是禮物得嗎？」有粉絲大嗌：「不行！」小豬就好唔客氣咁話：「那你出去！」

小豬話上次來香港開演唱會已經有一段時間，仲叫長輩帶小朋友來睇要有心理準備，因為去到尾聲會問呢度係咪夜店？之後鏡頭拍住台下戴住黑超嘅羅媽媽，小豬即刻叫媽媽起身一齊跳舞。

除咗羅媽媽，大螢幕仲見46歲嘅梁小冰，小冰即刻向小豬飛吻，小豬話：「Oh My God。我的梁山伯與祝英台呀，那時我才18歲，過了20年，嘩，妳還一樣年青，一樣漂亮。」小豬又話《少年梁祝》係佢第一套劇，當時18歲，但拍到佢好老又包包臉，不過一切充滿佢嘅回憶：「那時小冰已很好演技，導演又惡，我有不對就直接罵，很大壓力，因為這部戲之後不敢再演古裝片，對白很難背。很感謝小冰今晚來為我加油。」小豬再講：「自己戲劇作品不多，但有一部（《轉角遇到愛》）讓很多觀眾認識我，拍嗰時係有一種心酸，演嘅時候人人冷落我，大家都只係訪問大S，到劇集播出街嗰時，大家都係問大S，我就只係企後面，做咩反應都冇用。」