呢排股市大旺，即使噚日兩大地產商配股，加埋期指結算，但恒指收市都升51點，見慣風浪嘅前輩個個都「驚」多過「喜」。呢個世界冇長勝將軍，更加冇長升不跌嘅市，如果將恒指比喻為中環IFC部𨋢，到咗頂樓金管局總部，部𨋢點都會落返去。

近排見到位有番咁上下年紀同輩份嘅前輩問：「我都信股票一定跑贏其他投資，所以將強積金買晒股票基金，但家吓個市咁高位，使唔使轉番做債券基金呢？」
呢位前輩差幾年就退休享清福，根據最王道嘅強積金投資定律，越接近退休，強積金投資組合就應該越穩定，但好彩前輩有投資智慧，即使退休前呢幾年，都將強積金買重股票基金，所以回報甚豐。不過，可能越有錢、年紀越大，人就越錫身，加上閱歷深，見過唔少「領嘢」例子，所以凡事都唔會去得太盡。
對前輩嚟講，一兩年後已經可以攞番強積金，驚「臨尾香」可以理解，一提到股市，都係「恐懼」與「貪婪」，揀港股基金係貪心想強積金更豐厚，但驚佢會跌，貪字得個貧。敏妮覺得，揀邊瓣除咗理性嘅分析，更大程度係心理問題。
所以好唔好轉強積金？其實冇一個絕對答案，對於敏妮嚟講，仲要捱一段日子先有得攞番強積金，所以睇得好長遠，漫漫長路，敏妮相信股票一定可以跑贏債券，或者貨幣基金，所以你叫敏妮揀，答案定必一面倒。

敏妮惟有問吓股王A，佢話：「債券基金等於安眠藥，位前輩問得你點揀，即係佢覺得揀股市會瞓唔着，咁咪叫佢轉啲過債券基金囉，當啪粒安眠藥瞓得安樂啲；如果仲係驚到瞓唔着，咪啪多粒囉。但要記住，安眠藥有副作用，買得越多債券基金，港股起跌佢就越冇份分享，跌就冇事，但真係升，佢可能激到心跳手震。」
http://manlitalk.com/blogs/