韓國男團帝國之子嘅30歲成員光熙於去年3月入伍，接受完5星期基礎訓練，就以陸軍專門特技兵嘅軍樂兵身份服役。

光熙於今日退伍，今早現身位於首爾銅雀洞嘅國立顯忠園向媒體及粉絲送上問候。穿上軍服嘅光熙明顯比入伍前消瘦咗好多，令粉絲相當心痛，不過光熙就笑言：「可能要做嘅事比較多，所以瘦咗。」佢又提到當兵期間最想食嘅就係pizza及炸雞，而最想見嘅人就係一齊主持人氣節目《無限挑戰》嘅劉在錫、朴明秀等哥哥，對於《無限挑戰》嘅結束，光熙都大感可惜，不過佢喺當兵期間就有同《無限挑戰》導演、其他哥哥通過電話，所以都冇特別好唔開心。

光熙喺現場又笑言女團BLACK PINK畀到佢最大鼓勵，仲即時清唱Jennie首新歌《Solo》。最後光熙表示：「好多謝大家喺咁凍嘅日子嚟接我，講真我都冇諗過會有咁多人嚟，以後都會向大家呈現開朗、健康嘅笑容。」而光熙退伍後將透過節目《全知干預視角》回歸，並於今日就投入拍攝。

精選韓流，喺晒《娛果》
http://fb.com/appledailyent