林保怡的七歲雪橇犬阿水，去年十月突然後肢癱瘓，險些要人道毀滅，幸最後搶救成功，雖然阿水至今未完全康復，但仍能站起來、走出去，對保怡來說已經心滿意足。
這天，保怡帶阿水到西貢海邊漫步，憶述事發當日阿水的情況：「佢突然好似人咁坐喺度，只係得前肢有力撐住自己，醫生話佢椎間突出，一級係最輕微，五級係最嚴重，但原來佢已經係六級。嗰個時候我要選擇，打唔打針（人道毀滅）係我決定，因為醫生同我講，阿水下半身嘅器官可能會慢慢衰竭，咁啱爸爸當時又入咗醫院，我嗰時心情真係好差，不過我哋好好運，喺黃金十二小時內帶佢去診所，做完磁力共震之後，可以即時做手術。」當日手術做了三小時，阿水的背部從此多了長長的疤痕，但亦因此令保怡與阿水的關係更親近：「呢個係責任，唔係覺得隔籬邊個隻狗得意我又要養，係一世。」

嗲聲嗲氣伴在旁

阿水完成手術後，雖然保怡當時要到上海拍戲，也專程搭飛機返港探阿水。保怡說：「啲醫護人員話我隻狗好惡，次次見到都同佢打針，所以佢先唔鍾意，其實佢平日好善良、好黐人。」
住院兩星期後，阿水終於可以回家，但仍要以前肢支撐身體，事隔兩星期後終有起色，保怡說：「嗰日同佢覆完診返屋企，突然見佢後腳可以企起身，感覺好似睇電影，見到坐輪椅病人突然自己起身行一樣，真係好開心。」自此之後，阿水變得嗲聲嗲氣，當日訪問期間總是纏在保怡身邊，半步不離開，他說：「佢見到我返屋企，條尾好似直升機咁擺，仲會同我傾偈。」
採訪：盧妹