萬聖節節目：鬼差姐姐孖住你　食飽上天堂落地獄

蘋果日報 2006/10/30 00:00

萬聖節要玩得瘋狂，除食一餐食物賣相恐怖嘅大餐外，如果連間餐廳嘅布置都特別有特色，氣氛濃厚，玩都玩得投入啲。我覺得今年「王子酒店」最有噱頭。分別將3間餐廳以天堂、人間、地獄作主題，單係布置費已用咗5位數字！你唔怕死？就由鬼差姐姐帶你遊覽天堂與地獄啦！
記者：黃若茵　攝影：陳陶鈞、黃子偉
模特兒：Ada（TheGroup）、Pakho、Joey
化妝及髮型：Meegan&Kinki
服裝：天神村
地獄
最多遊魂野鬼
旅程由地獄開始，點解係地獄？因為四周圍都係遊魂野鬼！酒店地下一層ICY本身係酒吧加餐廳，以多款不同形象嘅鬼怪讓你感覺置身地獄，鬼差導遊Ada氣若游絲話：「因為鬼係屬於地獄嘅，所以呢度就放有好多骷髏頭，同怪異布置，歡迎你哋嚟到我屋企參觀！」聽見佢咁講，本來撐緊枱腳，諗住食餐飽飯嘅Joey同Pakho即刻打個冷震，個「冰冷殘酷地獄套餐」食到一半，就俾鬼差捉咗去遊覽地獄，走勻多個「景點」……
empty
■牛頭馬面都出動喇！條脷長到可以舔到你塊面喇！
empty
■地面有個樓底極矮，且天花呈圓拱形嘅位置，旁邊裝有兩隻尖牙，走入去，就好似進入魔鬼口中，有去無回！
empty
■地獄設有一個氣溫在零下的冷藏庫，鬼差Ada不知對Joey佢哋幾好，叫佢哋要着多件衫。
凡間
恐怖蜘蛛精
上到4樓ZIPLive，鬼差Ada突然變身做蜘蛛精，「蜘蛛係屬於人間嘅動物，我要變做蜘蛛精迷惑你哋呢班凡人，哈哈哈！」Joey同Pakho嚇到瑟縮一角，粒聲都唔敢出，驚嚇旅程又再開始……
empty
■Pakho俾蜘蛛精迷惑，雙手被蜘蛛網纏住，Joey想尖叫都嚇到出唔到聲。
empty
■Ada：「蜘蛛絲纏到周圍都係，你哋想逃離我魔掌？無咁容易！」
天堂
白色浪漫
上到24樓SkyLounge天堂，果然一大片天空，鬼差Ada突然變咗隻好鬼，佢話喎：「呢度嘅布置全以白色為主，配合天堂主題，天堂咁純潔，我都要做番隻好鬼，唔嚇人喇！」於是，Pakho同Joey終於可以靜靜哋，過一個寧靜浪漫嘅萬聖節喇！
empty
■天堂環境寧靜，實在係玩到攰後一個好嘅休息地方，話係天堂，真係無錯。
empty
■Ada做咗好鬼之後，同Joey佢哋不知幾Friend，手挽手一齊遠眺夜景。
地獄大餐
想食飽先玩，可到ICY食個「冰冷殘酷地獄」套餐（每位$188），有頭盤、餐湯（二選一）、主菜（三選一）及甜品，食飽就唔怕玩完無晒胃口啦！
前菜：升棺發財
棺材用麵包加朱古力醬做，棺材裏面有魷魚、蝦等雜錦海鮮，撈埋番茄醬好開胃。
empty
餐湯：屍蟲活現
一條條游來游去嘅蟲仔，其實係髮菜同野米，唔使咁驚。反而南瓜香味勁重，飲完都想再添多碗。
empty
主菜：血肉模糊
食物砌成一副鬼模樣，雙眼係荔枝釀黑水欖，頭頂嘅角就用菱角做，加多塊肉眼扒，一定夠飽。
empty
主菜：煎皮拆骨
一刀插入豬肋骨中，加埋一灘血紅色嘅紅莓肉醬汁，恐怖！但試啖勁好味，我將件豬肋骨煎皮拆骨。
empty
團員親身體驗
Yoko：「我本身勁怕毛茸茸嘅小動物，所以人間嗰層咁多蜘蛛最驚。」
empty
Anson：「冰室入面嗰隻骷髏骨，我開頭以為係人嚟㗎，點知原來係道具，嚇咗一跳。」
empty
Clara：
「冰室嗰度真係嚇一驚，入去嗰陣無諗過會係假人嘛！」
empty
天堂地獄人間　旅行團須知
團費：鬼門通行證
男士$300，女士$250（可隨意穿梭於地獄、人間及天堂，一般Cocktail及紅、白酒任飲）
出發日期：今晚及明晚
出發時間：10:30pm-5:00am
集合地點：灣仔謝斐道303號王子酒店
查詢：31882277
T.G.IFridays　骷髏陣地
T.G.IFridays本身樓底有戲院咁高，佔地兩層，偌大空間要布置都唔係咁容易！所以餐廳經理之一Lina決定以大大件嘅骷髏骨為主題，先能夠配合餐廳闊大嘅面積。一入門口左手邊，已可見一個半圓枱，放滿骷髏骨同埋載住面具嘅鬼怪，上面仲有一個大螢幕，到時會播住恐怖鬼怪片段，增添陰森氣氛。食個「齊齊驚慄套餐」，有前菜、小食、主菜、甜品同百事任飲，都只係$188，抵玩啦！
empty
■台前有3隻猙獰鬼怪對住你，唔驚就同佢哋合照！
empty
■員工每晚都會化行妝，令客人恍如置身鬼怪世界一樣。
empty
■電子琴被骷髏骨頭霸佔，你聽唔聽到琴聲呀？
小食：驚慌炸洩
有炸薯皮、炸芝士及水牛雞翼。炸薯皮上放滿芝士及煙肉粒，跟炸芝士一樣咁香口。水牛雞翼略酸，好開胃。
empty
主菜：科學怪魔
即係羊肋骨，炭燒過後肉香又Juicy，特製醬汁味道有點似紅酒。伴以混入芝士嘅薯茸，感覺好full。
empty
蛆蟲鍋
其實係蒜辣大蝦幼麵，加入辣汁食落非常惹味，又唔算太辣，食吓食吓就清咗碟！
empty
食客有say：
邊part最恐怖？
Amilio：「出面個台最多嘢睇，不過我覺得再多啲裝飾會更有氣氛。」
empty
Eva：「台上面彈琴個骷髏骨頭好嚇人，又或者吊喺天花板嘅骷髏骨幾恐怖。」
empty
搵鬼攻略
T.G.IFridays（23682800）
地址：尖沙嘴東企業廣場4樓及5樓
萬聖節餐時段：晚市6:00pm後供應
有着數：兩位成人惠顧齊齊驚慄套餐，帶第一位小童可免費享用兒童餐（原價$68），第二位小朋友則可獲半價優惠，須預先訂位