英國影星Clive Owen、何超瓊(Pansy)、諸葛紫岐、張德蘭夫婦、曹敏莉夫婦、「洗米嫂」陳慧玲(Heidi)、楊張新悅、葉梁美蘭等今晚現身灣仔君悅出席香港芭蕾舞團嘅籌款ball，Heidi就同女友人一齊嚟，不過就微笑揮手，同記者講唔做訪問。

對於日前有報道指四太梁安琪引薦大仔猷亨澳博嘅新項目，令老臣有微言，Pansy代為澄清撐猷亨：「首先，唔知道有呢個誤傳，阿亨一直守喺澳博有職務，之前有項目同我討論過，個報道話我有份參與澳博係錯，我係澳博係冇職務，要引用美國總統Trump，呢個係fake news，同埋佢哋係好資深嘅開國功臣，點會同後生仔過唔去，無必要。」

諸葛就抱病嚟捧場，佢就話自己患咗感冒，o岩o岩覆完診趕嚟，提到近排工作忙要周圍飛，講到病冇得抱囝囝，佢就話囝囝好乖，有拎藥同遞水畀佢。咁諸葛工作忙同病，咪即係冇時間造人生BB，佢就話：「順其自然，囝囝都成日想做大哥哥，想要細佬妹，仔女冇所謂，冇得控制，不過自己心態都ready，希望今年或出年，想個有小朋友陪佢成長。」

另外，拍過美劇《箭神》、現擔當《戰狼2》女主角嘅中美混血兒盧靖姍（Celina Jade）透露喺新戲入面，飾演無國界醫生。由於喺香港成長，佢希望可以拍港產片：「想同發哥合作，我媽咪做電影發行，《臥虎藏龍》都係佢做發行，試過喺地鐵撞到發哥，冧到暈。」Celina透露已有一個做餐飲業嘅法、美混血男友，更笑言冇愛情，點可以做演員。