【新增動新聞】

英格蘭代表隊中場阿歷士張伯倫今個夏天以3,500萬鎊由阿仙奴轉投利物浦，兵工廠領隊雲格就話，佢相信利記喺8月27日主場4:0大炒阿仙奴之前，已經聯絡過張伯倫，問佢有無興趣轉會。

英國《獨立報》報道，雲格無指責利物浦有無做錯，凈係話由於今季嘅夏季轉會窗喺英超開季後仲未「閂窗」，所以係無可避免咁話。雲格話：「有無其他球隊接觸過我哋嘅球員？梗係有喇！係咪喺比賽當日？咁我又唔認為係呢日嘅，我希望唔係喇，但呢種情況無得避免。」

阿仙奴喺轉會死線日都曾經想喺摩納哥羅致中場湯馬士林馬，雖然雲格無點名提到呢位法國國腳，但就提到林馬當日有份踢嘅一場波：「法國喺轉會死線日鬥荷蘭，你信唔信比賽當日，法國同埋荷蘭嘅球員無收過任何問佢哋轉唔轉會嘅電話吖？我就無咁天真嘞！」