那邊廂有樂隊「搵食啫」出席回歸show，這邊廂有歐錦棠調動綵排只求7.1行出來。早已獲封「良心藝人」稱號的歐錦棠，顯得格外珍稀，「如果你真係關心呢個地方，想發聲，希望改變現狀，為下一代、為政府可以更好，有良知、有信心，你唔做係唔夠，要有行動，呢個行動好簡單，就係好溫和咁行出嚟」。
「點都要出去行啦，香港人到咗今時今日，學國歌話，已經到咗最危險的時候，所謂盛世，全部都係粉飾太平，政府敗壞已經呈現晒出嚟。」

「係政府製造動亂」

歐錦棠直言不是每年7.1都上街，今年的確怒極，「用人唯親、ICAC……特首話搞僭建，搞到𠵱家仲未處理，醉波（陳茂波）話唔知幾多號屋已經處理咗，我理得你幾號屋，總之你就搞掂佢啦……製造動亂係佢哋，完全唔聽民意，競選時又話拎張凳、拎本簿落區，𠵱家做過啲乜呀？」
對於7.1商戶限時優惠，他狠批小家，「不過如果啲人嘅生活只係花喺細微花生龜苓膏上，掛住睇show嗌生嗌死，我同佢講呢啲嘢係廢」。同業出席河蟹show，他認為批評要公道，「佢哋都係做緊工作份內事，回歸日子既然係假期、係慶典，巿民歡樂，有煙花、有巡遊……藝人參與巨蛋冇問題，搵食啫，冇話規定演藝界就要對社會熱心，恐怖得過議員同政府對巿民漠不關心？」