兵工廠領隊雲格最近已經為韋拉被英足總控以行為不檢一事搞到好煩,點知班法國兵重係唔生性。好似周二阿仙奴贏曼城場波,隊長韋拉就好狼死咁踢到對手中場比高域斯,食咗件黃牌之餘,重夠膽死話人「插水」。
至於亨利入完波之後又揭起件衫顯示啲字句,雖然入面內容係慶祝某明星嘅BB出世,但始終算係知法犯法;搞到雲格賽後拿拿臨撐亨利,話規則係死,球員率性而為有時值得體諒㗎。亨利最後冇被追究,但雲格已一頭煙。
做領隊平時要諗計調兵遣將,球員犯事後又要同佢哋補鑊,真係做人領隊甚艱難囉。
簡尼幫球證趕助教出場
前日慕尼黑打吡賽後,球證歐斯共出示八張黃牌,同埋趕咗拜仁助教軒基出場,拜仁教頭希斯菲特賽後就彈歐斯唔識控制比賽氣氛。我求大俠覺得最搞嘢係呢位球證趕軒基出場時,並唔係直接去後備席畀牌,而係叫拜仁隊長簡尼幫佢叫軒基離場。唔知係佢尊重軒基,定還是拜仁班友惡嘞。
意勁旅肯貼錢為練兵
意甲終於落實響禮拜六開波,有人問我求大俠點解幾間大球會肯蝕底貼錢幫細球會?查實幾間大球會不嬲賺多其他球隊好多,而再唔開波操狀態嘅話,會影響佢哋備戰歐洲賽㖭。另外,最近有調查指足球幫到大部份意大利夫婦調劑生活,所以今次終於如期開波,算皆大歡喜。