擁韓國台灣血統嘅畢書盡（Bii），噚晚喺旺角舉行「2018 Bii my best moment香港演唱會」，唔少女歌迷支持，Bii喺台上不時擺出韓式心心手勢冧Fans。台下有歌迷不停大叫「好靚仔」，Bii就以廣東話答：「唔該晒！」

當唱到《My Girl》時，Bii仲即場除外套晒手臂，引嚟台下尖叫，又用廣東話唱出Beyond嘅《喜歡你》俾驚喜。演唱中段Bii走到台下同Fans握手，引嚟Fans們蜂擁而上，期間有Fans不慎撞到佢，Bii大叫「哎呀！」而近來人氣急升嘅ViuTV《全民造星》十強就擔任表演嘉賓之一，觀眾對姜濤嘅反應最熱烈。

演出後Bii受訪時透露，用咗一個月時間練唱《喜歡你》，但覺得仍有咬字唔清楚。如果識番個香港女仔，廣東話咪會進步囉？佢話：「很好，香港女生好熱情，全晚的歌曲也會唱。」講到剛才被Fans撞到兼好多人伸手「抽水」，佢笑言唔緊要，又打趣謂不介意被摸Pat，仲話：「希望下次推出專輯可來港演出，如有機會的話也想能踏上紅館舞台。」

精選娛聞，喺晒《娛果》
http://fb.com/appledailyent