【新增內容】
今屆奧斯卡頒獎禮告一段落，《忘形水》（The Shape Of Water）喺抄襲疑雲之下，依然成為大贏家，贏得最佳電影、最佳導演、最佳原創音樂、最佳美術指導，男女主角得主亦賽果正路。驚喜欠奉。

4大奧斯卡獎項嘅得獎片，目前仲可喺香港戲院睇到，《忘形水》上咗32日，每日大概都仲有15場上映。

《廣告牌殺人事件》（Three Billboards Outside Ebbing, Missouri）亦都上咗46日，目前都仲有戲院上緊，每日一場。該兩片都由香港發行公司二十世紀福斯影片透露，照往常奧斯卡得獎片，都會加放映場數，相信《忘》片同《廣告牌》都有機會，當然最後都由戲院商手決定。其中《廣告牌》同《玩轉極樂園》喺iTunes好快已經有得睇！同時，《廣告牌》及《玩轉極樂園》均可以在影視點播站(Now TV 106台)睇到呢兩套得獎作品。

由出爐影帝加利奧文（Gary Oldman）主演嘅《黑暗對峙》（Darkest Hour），唔經唔覺上咗60日，目前每日仲有4場左右。

最佳動畫獎得主《玩轉極樂園》(Coco)、最佳改編劇本《以你的名字呼喚我》（Call Me By Your Name），有份入圍但空手而回嘅《不得鳥小姐》（Lady Bird）、《戰雲密報》（The Post）等作品，目前喺香港戲院仲有得睇。