【正能量滿滿】出發再搵異國港女人妻 陳貝兒初訪以色列遇奇景
落雹以色列嫁到這世界邊端
陳貝兒再次出發找尋嫁到異國嘅港女人妻,呢站去咗以色列。(ig圖片)
出發前擔心唔習慣異國習俗,事前已做足功課。(ig圖片)
貴人出路招風雨,陳貝兒初到以色列遇到當地40年難得一次落雹。(ig圖片)
陳貝兒去年主持無綫節目《嫁到這世界邊端》,追訪過埠新娘嘅港女,分享佢哋離鄉別井追求真愛,更在異國落地生根情況,同時揭出貝兒外景期間已離婚,所以聽到被訪者幸福婚姻古仔,貝兒感觸落淚。《嫁》反應唔錯,無綫決定開season 2,貝兒前晚隨隊出發外景。據知佢此行會去以色列、韓國,繼續發掘港女成異國人妻故事。
貝兒同攝製隊今日凌晨到咗以色列,佢立即facebook打卡,佢留言:「第一次嚟以色列。齋聽個名就覺得好神秘同埋印象中係保守啲嘅國家,所以出發前我都特登WhatsApp問咗呢位嫁到去以色列嘅港女人妻,睇吓我有啲咩要特別注意嘅,又或者啲衣着使唔使話要保守啲咁,好似上次season one去中東時候咁包到實。『梗係越sexy越好啦。』佢覆我。『我哋呢度先進過香港㗎喎。』心諗:正啦今次。所謂正嘅梗係唔係sexy嗰part啦,而係正啦今次又遇着個烈女。I like!」
「好多朋友知我去以色列都叫我要小心啲,但係聽呢位以色列人妻講佢哋呢邊好安全唔值得要驚。又或者,只係我哋習慣用自己嘅『印象中』嚟判斷一啲神秘嘅未知。12個鐘頭機我瞓足10個,好飽好滿足。可能最近真係太攰。電已叉滿,I’m readyyyyyy.Hello Israel, please be good to me...」
俗語話「貴人出路招風雨」,貝兒初到以色列報到,竟遇到當地40年難得一次落雹,貝兒今日向傳媒報平安,佢話:「今次出發,我唔敢睇番第一集,想以全新狀態出發,有啲網友話鍾意睇我喊,但有啲叫我笑多啲,搞到我哭笑不分,不過嚟到遇上40年難得一見落大雹,我o依家真係哭笑不得。」
精選娛聞,喺晒《娛果》
http://fb.com/appledailyent