綽號「超區坦克車」嘅本土派元朗區議員王百羽，選舉開支同身型一樣夠晒龐大，佢向選舉事務處申報嘅選舉開支接近485萬元，暫時係選舉事務處公開嘅「超區」參選人申報資料中數額最高。其次為民主黨「鄺神」鄺俊宇（842,719元）、被指係岑敖暉Plan B嘅陳劍琴（525,196元）、岑敖暉（506,501元）同涂謹申（407,537元），全部都同王伯相差一大截。建制派唯一「超區」參選名單、民建聯主席李慧琼參選團隊嘅選舉申報據知有近千頁資料，暫時未公開。

究竟王百羽啲錢用咗喺邊？八方睇過佢嘅選舉開支申報，當中92萬用咗喺形象指導設計、撰寫講稿、化妝、攝影同埋錄像服務等，用喺社交網站發佈嘅選舉廣告費亦達到96萬元。大家可能好奇，王百羽邊度搵400幾萬打選戰？根據佢嘅申報資料，原來超過450萬元嘅選舉服務同貨品由一間叫「U Made This」嘅公司捐贈。

八方查過呢間公司註冊資料，發現公司最大股東係國際關係學者沈旭暉創辦嘅GLOS Company Limited，而呢間GLOS創作總監陳梓謙亦係「U Made This」董事之一。八方曾致電王百羽查詢，暫未獲回覆。

根據選舉申報公開資料，「U Made This」呢間公司除咗捐錢畀王百羽參選，亦捐咗製作費價值2,500元嘅選舉錄像訪問，畀參選九龍西嘅沙中線吹哨人潘焯鴻。同為「希望聯盟」參選人，用咗超過130萬元參選嘅潘焯鴻大部份開支都係佢自己出，唔似得聯盟新東參選人李啟廸咁獲田北俊捐贈30幾萬。潘焯鴻亦同李啟迪一樣，幫襯咗曾俊華前政助羅永聰開嘅公關公司「蘇杭街一號」，5個月嘅選舉策略等服務盛惠6萬元。至於佢嘅參選政綱，原來搵咗不時喺報章評論時事嘅劉健宇幫手草擬。

而由經民聯「鼠王芬」梁美芬帶領一班黨友所唱，遭到唔少網民恥笑係洗腦歌嘅「點解要攬炒？」，相信大家記憶猶新。鼠王芬嘅選舉申報顯示用咗57萬參選，其中2萬蚊係為咗幫洗腦歌填新詞、錄音同混音。八方查過負責製作嘅「框架音樂事務有限公司」登記資料，發現係由去年曾出席撐警集會嘅前港台DJ鄧慧詩創辦，夠晒政治正確。鼠王芬除咗唱歌，另一拉票方式係出信，7月底佢就將3封內容一模一樣嘅「尋求支持信」分別寄咗畀九龍城區居民協會、家維區居民聯會同黃埔居民協會嘅主席，每封信只值五毛。

沈旭暉周三晚以短訊回覆《蘋果》查詢時話，GLOS其中一間有投資嘅子公司UMT，負責提供創作服務，由公司董事之一嘅創作總監打理，同時係UMT主要創辦人。

沈旭暉指，今次UMT捐出數個月免費服務畀王百羽嘅行為，係由UMT嘅創作總監決定並作出申報，但事先並未知會公司其他股東，佢自己作為投資者，都係周三先得悉呢個安排，並指：「提供大規模無償服務，並非我的習慣」。

佢又話，個人並不認識王百羽，佢自己由於近月人在台灣，周三委託香港同事同有關員工溝通後，先知道呢位創作總監的確有份主力策劃王百羽嘅選舉工程。沈強調，雖然根據選舉條例，選舉捐贈唔可能得到任何政府資助，所以唔會有公眾損失，但事件令公司形象帶來影響，「經溝通後，該員工對此感到愧疚，我們也已即時進行內部人事處理，公司也已任命新負責人」，話希望日後同呢位員工再有合作機會喎。

沈旭暉周四就再喺facebook進一步回覆，指自己比公眾更晚得知今次報價同捐獻，個人曾為支持的眾多候選人拍攝YouTube訪問，均通過UMT申報街坊價$2500，而王百羽係創作總監私人好友，相信係通過一啲舊同事認識，今次project係佢全力爭取回來，而查證之後創作總監幾乎係王百羽嘅競選經理人，而今次行為難免令公司、和集團其他公司、以及佢本人形象帶來影響，亦令媒體莫名其妙以為佢係一位毫不認識嘅候選人「金主」，所以經過溝通後，嗰位員工即時辭職，沈旭暉佢哋亦決定喺完成手頭項目後，會結束子公司UMT，並會嚴訂日後政策：任何子公司均不會再接受任何和香港選舉有關的project。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！