唔知大家仲會唔會睇住電視撈飯㗎呢？如有嘅話，咁噚晚有冇睇到《愛·回家之開心速遞》呢，劇中飾演Helen姚瑩瑩仲扮晒殭屍，唔知有冇嚇親大家呢？

但原來拍攝時，發生咗一啲不為人知嘅小插曲㗎！是咁的，噚晚嗰集係講到劇中Helen，為咗幫歐瑞偉飾演KC恢復記憶，佢就扮殭屍想嚇KC，結果係點，相信有睇嘅就會知，冇追開嘅都唔會想知。

大家嘅認知入面，殭屍係有尖尖嘅牙齒，瑩瑩為咗扮呢個殭屍嚇KC，佢都做足準備，但係竟然就發生事喇...就係拍攝完咗，佢除唔番隻殭屍假牙出嚟，瑩瑩係圖文並茂話：「有樣趣事同大家分享，當我拍完場殭屍戲之後、發現甩唔到一隻殭屍牙！KC好好請我飲咗杯熱咖啡以為佢會甩！點知都唔甩。唯有帶佢返屋企，因為第二日仲要繼續開工！@歐瑞偉@李衛健@林淑敏」，咁有網民睇到都好替佢擔心，問佢咁樣返屋企會唔會嚇親阿仔，瑩瑩就回覆話自己返到屋企，阿仔都已經瞓咗覺，叫朋友唔使擔心。而請瑩瑩飲咖啡嘅KC亦有留言話：「哈哈……辛苦晒你、我忍唔住笑咗出嚟！」瑩瑩都有好禮貌咁覆番KC：「沒有問題、謝謝您杯咖啡」。

精選娛聞，喺晒《娛果》
http://fb.com/appledailyent