容祖兒（Joey）同李克勤喺紅館一連12場嘅「容祖兒李克勤演唱會」，噚晚8點半開鑼，全場爆滿。兩人以一曲《未知》打頭陣，甫開場有大頭dancer同蒙面dancer勁舞，克勤同祖兒各據台一角，祖兒以西班牙鬥牛look上陣，克勤則西裝骨骨，連唱快歌，大跳勁舞，不過似乎祖兒舞得勁啲。

之後兩人再大跳貼身舞，祖兒仲擒喺克勤度，不過都係點到即止。兩個唱得之人，唱唱下仲好似鬥唱咁，極盡視聽之餘。

唱《逃》同《嘭門》時，克兒更挑戰MJ經典舞步SmoothCriminal，但祖兒只需要兩dancer拉住，克勤要四個dancer拉住，同埋明顯震晒……噢……不過克勤今次真係博老命，挑戰MJ之餘仲孭住祖兒做好多高難度動作，俾啲掌聲！

此外，溥儀眼鏡老闆及太太、楊受成夫婦、蔡一智夫婦、鍾欣潼、何超蓮及徐小鳳都有份捧場。