陳思銘（Samuel）被喻為「教育界王力宏」，有傳32歲的他已白手興家坐擁近億身家；最近又是娛樂版常客，與視后唐詩詠傳拍拖，指他在北角購入2,000萬豪宅準備同居；當中還有一個都市傳說，網上作家葉朗程真人，便是陳思銘。

Samuel日前在其位於銅鑼灣佔地4,000呎的升學中心接受訪問，當日是星期日，他拍完香港開電視節目《男士堂》再趕返公司，工作好忙碌。他說：「其實我邊有時間拍拖，佢（詩詠）有劇拍，我又有節目，我真係（周）一至六都要返工，周日拍嘢，大家都好忙。其實我識好多娛樂圈朋友，食過幾次飯，但可能佢娛樂新聞價值高啲，咪多人寫囉。」

Samuel與前度女友分手兩、三年，坦承恨拍拖，但現在沒有女朋友。與唐詩詠關係，他用肯定語氣答：「好朋友囉，追求？一定唔係。」一齊行山？他說：「唔好逐個逐個研究嘞，再講對佢唔公平，我同佢都真係單身，大家係好好朋友。」問到擇偶條件？他直認要求高：「合眼緣，要溝通到，仲要錫屋企人，我仲同緊媽咪一齊住，要搞掂我阿媽先可以搞掂我。」姊弟戀？Samuel陰陰嘴笑說：「年齡唔係一個問題，國籍都唔係一個問題，香港好多好女仔，但我見親都係媽咪同小朋友，冇中間個age group。」對於被爆到骨場按摩，他解釋：「我都好鍾意啲字眼，巧妙地避開任何法律責任，而又可以用照片說故事。最近香港好難過，如果咁嘅小故事可以幫香港人放鬆一下，都冇所謂，我只係為我嘅同事們覺得抱歉。」

多次被影到與不同女伴出入，Samuel的花心形象與葉朗程不謀而合。早前葉朗程在社交網寫了一段約金牛座女子慶祝生日「爆房」的故事，相中主角竟然貌似唐詩詠，網民隨即聯想到Samuel便是葉朗程。他直言被網民鬧爆：「好多人私訊嚟鬧我，話好唔開心，令佢哋冇晒幻想，又話破壞男神，又話破壞女神，根本上我唔應該喺呢個故事上出現。」他強調自己並非葉朗程：「我都鍾意寫嘢，但我呢度唔係ifc，我個樣又唔似張智霖，但佢（葉朗程）係我一個好朋友，既然佢想保持神秘，應該尊重佢，畀佢繼續保持神秘。作為一個作家，無人知佢係邊個，寫嘢可以冇包袱，佢真係一個好有talent嘅人，但梗係唔係我啦。」

Samuel自9歲便到英國讀書至碩士畢業，24歲開辦「英識教育」搞升學顧問生意，協助學生與英國中、小學校配對，至前年有私募基金入股，當時公司估值達8,000萬元。據悉Samuel除在香港置業，英國亦有三層樓，他謙說：「梗係唔係過億啦（身家），英國物業要嚟投資，有間600幾萬買完，即有兩萬幾蚊收租，回報率唔錯，但全靠自己，唔係full pay，仲要供㗎！」Samuel不算得是富二代，陳家世代都在流浮山賣海鮮，雖然父母小學也未畢業，但就努力供養兒子到海外讀書，以每年數十萬元生活開支計算，14年來都花上數百萬元，他說：「我細個好曳，佢哋聽朋友講送個仔去外國，先畀我參加遊學團，之後我就揀咗去英國讀書。我都知佢哋供我讀書好辛苦，因為越來越少海鮮酒家，媽咪唔係大老闆，要落去捉魚嗰啲，真係要捱，見佢哋成日出入當舖，我真係好感激。」

近半年，香港受逆權運動影響，不少人都選擇移民，或送子女到外國讀書，尋求更多出路，Samuel說：「仲越來越年輕，最細5歲就走，家長可以陪仔女一齊去，7歲可以寄宿。」問到生意額是否急增？他說：「係多人去咗，阻力少咗，但唔係坊間諗咁多。好似上兩星期我哋搞咗個教育展，原安排20、30間學校，投資都好大，但撞正示威活動，大家都會受到影響。」至於未來大計，原來他一直夢想開辦學校，他說：「覺得香港教育好有問題，排位上一定係中英數行先，幾何係Art，但國際經濟論壇上都講過，2030年最需要嘅技能係創作力同思考能力，但香港教育只重視搵答案，抹殺好多可能性。反而英國讀書，學生同老師嘅感覺係朋輩，開心點會唔鍾意返學，學地理就去摸沙石，人哋話讀書唔局限於課室，英國真係。不過我知呢個夢好遠，香港地太貴，要建立一間好學校，需要有空間，仲要請到好老師，我做生意亦唔係全為錢，唔係去做金融啦，使乜做教育咁辛苦。」

採訪：嵐山
攝影：陳俊強
攝錄：林嘉銘
-----------------------------
《2019高級珠寶鑑賞誌》
點擊即睇過百款鑽飾名錶
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇