楊崢同黃宗澤(Bosco)爆出姊弟戀後,負面新聞陸續有嚟,最爆係傳出趁黃佩霞大肚時,搶咗對方老公,又指佢係模界孤獨精,而楊崢連日來只係話:「唔係事實唔回應。」仲死撐話同Bosco關係「一切如常」,不過同楊崢同期出道嘅黃佩霞﹑陳嘉容及歐陽妙芝,近日亦先後回應相關報道,妙芝仲數臭楊崢,指佢搞散人哋頭家。
至於份屬後輩嘅模特兒姚書軼(Mikki),今日出席珠寶品牌活動,都有提起Bosco同楊崢嘅戀聞。講到妙芝噚日力數楊崢,Mikki話:「妙芝係性情中人,大家係好姊妹,佢哋係我前輩。同佢(指楊崢)做嘢,一隻手指都數得晒,初初嚟香港做嘢,都有聽啲古仔,我哋唔係好熟,但係發覺大家工作上做嘢方式唔同,出到去我哋一堆人,佢會唔知去咗邊,佢名模呀嘛!」
點知Mikki愈講愈興起,仲爆咗楊崢做嘢noshow嘅經歷,佢話:「有一次做完騷,都見唔到佢,咁都得㗎咩?可能當時有意外啦。」