郭女士與記者談起今日與昔日生活,感觸良多。「以前我好健康㗎,最鍾意行山,真係冇諗過今時今日會搞成咁,𠵱家行快步都唔得。」瘦骨嶙峋、臉色蒼白的郭女士說。
和許多女孩子一樣,郭女士十多年前結婚,其後懷孕生育,她一直走着一條愉快而平凡的道路,直至九一年,一切開始改變。「生完第一個女之後,開始覺得有啲唔妥,啲關節成日冇端端好痛、好僵硬,後來做咗好多檢查,最後證實患咗紅斑狼瘡症。」
藥物副作用厲害
最初的一段日子,藥物還可以為郭女士帶來一定的幫助,雖然身患頑疾,但她仍可如常上班,繼續做文員的工作,可是近四、五年,情況每下愈況,加上郭女士同時誘發出癲癇及哮喘等其他病症,莫說工作,她連照顧自己亦感到困難。「𠵱家我雙腳嘅髖骨已經開始枯萎,行步路都好痛,四十歲人就要成日拎住支柺杖,不過,最弊都係啲藥物副作用太犀利,搞到我肝酵素好高,早排先因為咁入醫院住咗一個月。」
「感覺安全好多」
郭女士年前婚姻失敗,一對女兒交由前夫照顧,她則租住一個只有數十平方呎的小套房,過着獨居的生活,沒有人照顧。
她對記者表示:「𠵱家一個人住,冇人照顧,其實都有擔心,好似有一次行行吓街,突然癲癇症發作,差啲俾架電單車撞親。另外,有一次又係咁,自己都控制唔到自己,不斷抽筋咬脷,嗰次好彩我妹妹喺度,幫我報警。」
面對一次又一次的突然病發,令郭女士意識到自己的處境其實頗危險,並萌生安裝平安鐘的念頭。「如果有部平安鐘,有乜唔妥只要㩒一吓鐘就有人嚟救我,感覺上安全好多。」