呢輯相絕對唔係傳說中嘅「性向測試」——係嘅，的確，係好容易令人錯焦點。

千真萬確，呢個，只係一個驗眼Test。圖中呢位女子，你，記唔記得佢？

香港就係咁奇怪嘅，每年七月一定群波亂揈，在一片「認胸唔認人」風潮下，圖中女子亦曾出奇制勝。但，佢唔係土炮。

好啦開估，佢係張暖雅，Angelina。如果有睇開蘋果動新聞，一定對Angelina不感陌生。2011年，祖籍山東嘅Angelina來港旅遊被發掘，2012年進軍影壇，演過《喜愛夜蒲2》、《一路向西》、《猛龍特囧》，憑「D Cup乳牛」同Jeana爭鋒頭。嗰陣仲爆出裸照外洩、被傳整容等等等等，但最令人難忘，係佢個「阿梅妝」，《少林足球》嗰個阿梅，令人不禁懷疑，張暖雅係得罪化妝師。

依家嘅張暖雅，已經離開咗香港娛樂圈好耐，2014年去咗台灣發展，作品方面呢……原來佢仲出咗隻碟叫《暖心》（有衝動搵link聽嘅，去呢度： http://bit.ly/2F81Wjm ），之後又拍咗部中泰合拍驚悚片《泰驚魂之無骨按摩師》。去年又拍咗套網絡電影《風水賭神》，似乎工作唔多，但面珠仔就由朱古力色變到依家白雪雪，令人嘖嘖稱奇！

精選娛聞，喺晒《娛果》
http://fb.com/appledailyent