近日天氣炎熱，高溫隨時令人頭昏腦脹，一位的士司機唔知係咪好似馬時亨話齋，天口㷫，或者朝早冇祈禱，星期五喺黃大仙揸車時，小路出大路時不旦冇讓車，仲喺雙線雙程行車嘅馬路上，同一架巴士並排逆線行車11秒，過程驚險。

現場係黃大仙杏林街，朝早10點幾，一架巴士沿杏林街行駛，至康強苑停車場外，一架的士突然駛出，巴士馬上響安警告，但的士冇理會踩油照樣駛出，同巴士並排逆線行駛，其間經過埋交通燈，等到巴士埋站收油時先切返正確行車線。

巴士司機Jason話當時一車老友記，絕無可能急煞車，以免整傷老人家。Jason話自己揸咗5年巴士，第一次遇見咁癲嘅司機，可以完全唔理路面交通情況，大鬧的士司機太過份，「夾硬嚟，想報仇咁嘅心態」。幸好Jason夠專業，冷靜慢慢停低巴士，全車人先至避過一劫。

你敢爆，我敢獎！ 即Call《蘋果》24小時爆相爆片熱線 ：63836568