一名投資者「上屋換下屋」，足足慳番七十六萬，易手嘅單位重賺咗近二百萬，認真好數口。
中原地產高級分行經理歐陽振邦表示，呢名投資者舊年用三百五十萬七，買入長沙灣宇晴軒五座高層C及D室相連戶，面積一二九一呎，早前以五二六萬沽出單位，賺咗一百七十五萬三。
唔夠一個禮拜，佢再用四百五十萬，買入同座低幾層C及D室相連戶，呎價三四八六元，低市價逾一成。兩單位景觀差唔多，價錢就差成七十六萬，若佢第日將單位出租，租金回報率重相對高唔少。唔知接佢貨嘅買家，有冇後悔早咗入市呢？
蘭西睇中原網頁，發覺宇晴軒二手成交都好活躍，但相連戶買賣就好罕見。

仲量聯行截行家胡
上周大額投資頻現，仲量聯行都算威威，幫完老牌建築商邱南記以二億六千萬元沽出中環靚舖，又替捷成洋行以一億二千七百八十萬，售出觀塘海濱道一八一號工業地盤。
此標本由另一家物業顧問行處理，但截標前已經成交，仲量聯行港區董事古嘉豪話，買家會興建寫字樓，作為轄下生產業務嘅香港總部，地盤可建樓面約三十萬九千呎，每呎樓面地價約四一四元。
蘭西記得由仲量聯行標售嘅觀塘安建大廈全幢已截標，未知幾時有消息公布。