話說某日下午茶時份，我收到一個電話。內容係一位大嬸話自己漏低咗一袋用某百貨公司紙袋入住嘅嘢。因為個客係walk-in，所以袋嘢就咁放咗喺reception。循例我就問小姐拎返啲資料做record，等佢返嚟拎啦。點知……

大嬸：「其實我而家返緊嚟㗎啦，我差唔多到你就落嚟地鐵站畀我啦！」

吓，咩料呀，家陣我同你交收呀！？

我：「Er……小姐我哋唔會拎落地鐵站畀你㗎，麻煩你過嚟餐廳拎呀！」
大嬸：「吓！即係要我出閘呀？咁我咪要畀多程車費！」
我：「小姐，我哋餐廳而家得2個人on floor，仲有好多客人喺度，無可能專登離開餐廳拎畀你喎。」

下午茶我哋開半場，只係得兩個人on floor，仲要嗰日個場都爆爆哋，所以更加無可能拎出去畀佢。但最重要係，我查實真係無義務一定要出餐廳拎畀你㗎喎！

大嬸：「得啦得啦得啦！麻鬼煩。」（Cut線）

無幾耐，大嬸返嚟拎嘢配個嬲爆黑面樣，袋嘢當時放咗喺reception，嗰陣我出緊drink。大嬸打算直接喺reception拎咗袋嘢就打算走，無諗過叫我哋。但我都係要循例對一對電話，所以就叫住阿嬸，叫佢等等。不過查實聽口吻都知電話入面嘅係呢條大嬸。佢好晦氣講完個電話No.，就拎咗袋嘢轉身走。背住我嗰陣仲好晦氣地贈多我一句：真係想收返份加一，小小嘢都做唔到。

哇！真係好似係我迫大嬸漏嘢喺我公司，再迫阿大嬸返嚟拎咁。如果個個都話漏低嘢喺餐廳，餐廳係有義務免費出街送返畀個客。咁客官們可以留低百幾件行李，打個電話嚟叫餐廳送去機場快線畀佢囉！因為客官大人話唔想畀多程車費，而且畀咗加一服務費㗎嘛，唔係小小嘢都做唔到下嘛！

即係食一餐飯五舊水，加一畀多五十蚊就可以買起嗰間公司嘅奴隸，任用全日做送貨咕哩！食得cheap啲，十蚊都有得送貨！大家以後就可以唔使叫咩膠膠van啦，大條道理乜都漏低晒喺餐廳，加一有埋免費送貨！玩下手送得遲，又可以瘋狂投訴，食吓免費餐，諗起都爽歪歪呀！

不過前提係，唔知餐廳會唔會「唔小心」瘋狂唔見你瘋狂漏低嘅嘢啫！你知啦，餐廳啲CCTV都係做吓樣，到時真係偷雞唔到蝕渣米呀！

專欄作者簡介：
The Beggar in the Restaurant 店小二Mary
我係一位從來唔對客人黑面，經常笑面迎人嘅侍應，著有《乞客MENU》。

Facebook專頁：The Beggar in the Restaurant乞客
https://www.facebook.com/BeggarintheRestaurant/

發掘更多身邊的小城故事，請LIKE 蘋地 Facebook Page，並設定為「搶先看」： https://www.fb.com/appledailyland