六四遊行噚日喺風雨中進行，得好少立法會議員參加，數埋淨係得高達李永達、楊森、李卓人、何俊仁、張文光、涂謹申、長毛同郭家麒。啲市民已經唔期望劉千石參加，但令人意外少少嘅係，公民黨六個議員竟然冇人參與，淨係得個張超雄出席咗遊行前嘅論壇，全程參與嘅得個秘書長鄭宇碩，真係令啲民主擁躉失望。
華叔話，可能遊行辛苦啲，四大狀（余若薇、湯家驊、梁家傑同吳靄儀）都唔嚟，希望佢哋參加燭光集會補番數啦！
公民黨創黨冇耐，因為黨主席關信基話紀念六四無助香港民主，結果就俾人質疑六四立場唔堅定，噚日冇人去遊行，恐怕又會加深人哋嘅「成見」。湯家驊事後同八方話，四大狀其實一直冇去六四遊行嘅習慣，淨係去燭光集會，所以唔係話唔紀念六四，其實佢哋都係左右做人難，如果今年一齊去遊行，啲人就會話佢哋「痛改前非」，不如跟番一貫嘅做法算啦。
因為咁樣，冇參加遊行嘅湯大狀噚日選擇咗同屋企人過familyday，遠離六四是非。其他三個大狀，八方就搵唔到佢哋，傑哥同民主女神都冇覆機，所以真係唔知佢哋點解唔去喇。

譚香文竟然「唔記得咗」

民主肥女神譚香文仲寸湯大狀，話佢寧願familyday都唔去遊行，真係唔應該咁懶喎！仲話自己冇家庭就冇辦法，湯大狀就應該一家大細去遊行、薪火相傳嘛！
不過有口話人冇口話自己，譚香文自己都冇去遊行，理由竟然係「唔記得咗」，唔醒起六四遊行喺五月喎！咁都唔記得，八方真係冇眼睇。
公民黨對六四最上心嗰個叫張超雄，雖然冇現身遊行隊伍，但喺會前論壇做演講嘉賓。佢好大聲話，六四唔係民主運動嘅包袱，而係中共政權嘅包袱！雖然中共領導人換咗，但唔代表𠵱家唔使負責，中共唔可以唔道歉、唔賠償就算，六四係好大嘅傷口，一定要平反！

傳真︰2623-9278
電郵︰[email protected]