立法會3.11補選，點只九龍西、新界東同港島三區直選咁簡單？咪忘記仲有
建築、測量、都市規劃及園境界嘅功能組別補選，前議員謝偉銓（Tony）拳磨擦掌準備去馬一雪前恥；有別於上屆選舉，Tony此仗強攻網戰，近期po咗唔少短片簡介關注點。

近日佢以民間智庫「思籌知路」召集人身份到訪政府測量、規劃、建築專業同事做嘢嘅寫字樓，直擊辦公室日久失修兼唔夠工作空間，例如員工座位三尖八角，塞滿文件難以進出，天花板則有唔少電線外露吊吊揈，據知有外來則師要改圖，因為冇地方要趴喺地下做，難怪Tony都覺得難以想像，質疑負責起樓、建築、安全嘅部門，自己嘅寫字樓環境點可以咁差？佢要求政府為有關部門專業人士增加資源，改善環境設備，唔單止幫業界，仲對社會有好處，因為可以加快建屋審批兼提升樓宇供應。