芬蘭同荷蘭反對歐洲穩定機制（ESM）可以直接喺二級市場買債，即係話歐盟峯會傾完嘅嘢都係有變數。咁點解港股噚日仲有得升？因為仲有歐洲央行周四議息頂住，至於會有乜好嘢，大家都預咗會減息，相信亦有人炒緊新一輪長期再融資操作（LTRO）出台。晉佳有個疑問，咁希臘點樣呢？
晉佳承認估計形勢估得太早，但係希臘成立聯合政府後即刻話要延遲削赤時間表，證明晉佳完全估中上半場，仲要絕到希臘出席歐盟峯會都要個個扮病，似乎有大佬（好可能係法國、歐豬）同希臘夾好計遲早要發難，否則希臘冇可能咁老定。歐盟峯會上，德國就範原來都係扮嘢，仲有同一陣線嘅荷蘭反對ESM二級市場買債，證明緊縮派未肯就範。
如果要港股向上突破，就要有減息、LTRO之外嘅突如其來好消息。睇番技術圖表，反映未來兩個星期係關鍵。先睇恒指周線圖，如果未來一至兩個星期保持上升，就可以形成MACD買入訊號，從來周線圖訊號線突破MACD線都係可靠嘅向好指標，加上訊號一出，指數同時會一浪高過一浪，就似乎有更多證據證明中線向好。

另外，睇美滙指數，14個月RSI處於56左右。事實上，美滙指數嘅14個月RSI近期喺40至60之間徘徊，長線方向唔明確，但呢個時候已經不宜重拾升勢，否則確認美元進入長期升浪，後市凶多吉少。至於倫敦富時指數同德國DAX指數，14周RSI都係50左右，歐股都面對考驗。
由於嚟緊星期四，歐央行先會議息，仲有LTRO嘅憧憬，今個星期港股仲可能頂得吓，但投資者唔適宜有太多操作，持淡倉可以買剛起步嘅細價股短炒對冲，至於冇淡倉而等買貨嘅朋友，就唔使急入市，觀望到下個星期先算。
晉佳覺得基本因素好轉嘅股份，短線要攻守兼備，內地保險股近期有唔少扶持政策，已經變成國策受惠股，仲可以跑贏大市，由於中國人壽（2628）是大藍籌，近期俾資金舞上去，已返到之前跌穿咗嘅上升通道下軸，怕有啲阻力，博資金炒番啲細隻啲嘅，可留意中國太保（2601），博佢上番28蚊，跌穿保歷加通道中軸（現處於24蚊）止蝕。

晉佳
本欄逢周一、三及五刊出