獲頒諾貝爾物理學獎嘅「光纖之父」高錕重臨香港，據講日內抵埗，將出席多項活動。高錕呢次以新形象回來，就係以留鬍鬚形象亮相。
高錕留鬚已經有一段日子，少咗彬彬學者氣質，變得有啲豪邁，佢facebook有張上月底影嘅相，可以見到高錕精神好好，笑容一樣咁燦爛。佢facebook管理人留言，指高錕想喺今年嘅聖誕節變身聖誕老人與眾同歡，有13人畀咗個「like」佢，一名網友仲提早同佢講聖誕快樂。

出席基金成立禮

高錕獲得殊榮後，今年初與太太黃美芸回港慶祝，3月尾返美國，半年後重臨，據講此行會逗留較長時間，大約好幾個月，唔止喺香港過中秋節，更有機會喺香港扮聖誕老人，如果佢真係變身聖誕老人，相信好多人想收佢份禮物。
高錕有老人癡呆症，今次回港主要活動之一，係出席下周二「世界老年癡呆症日」舉行嘅高錕慈善基金成立典禮。呢個基金旨在令更多人關注老人癡呆症，協助病人及其家屬。為咗紀念呢個特別日子，郵政署將發行為高錕而特製嘅郵票小型張，每張賣13.5元。小型張上有高錕肖像，背景係一束光纖，係郵票設計比賽冠軍作品。
光纖已經成為大家上網必需品，但如果未見過光纖係點樣嘅科技產品，不妨用68蚊買本郵政署出嘅紀念小冊子，因為隨書附送一小束光纖，賣書部份收益撥捐高錕慈善基金。有關產品同日起在各郵政局有售，高錕做善事，八方呼籲大家響應佢共襄善舉。

10月領大紫荊

另一重頭活動，係出席10月喺禮賓府舉行嘅授勳儀式，港府今年7月1日宣佈會頒授大紫荊勳章畀高錕，會由特首煲呔頒勳章，高錕今趟返香港，實行先領勳章，12月再扮聖誕老人，大家開心。
中大方面亦籌備迎接高錕活動，再次慶祝呢位出色前校長回歸。本月27號，中大在校園內豎立嘅高錕銅像舉行揭幕儀式，高錕會親自主持。

mailto:[email protected]