建制派在新一屆區議會選舉崩盤式落敗，多名雙料議員墮馬，民主黨立法會議員尹兆堅則在自己從政的起點再上馬，勝選感言以「哀矜勿喜」一言蔽之，在民意海嘯下取得議席勿沾沾自喜，必須趕上建制派的地區動員能力，「（區議會）呢個係政治角力、民意反映（平台），做區以外要做得闊啲」。素人群起，他不擔心合作有問題，惟恐政權「玩嘢」，將區議會空城化，所以先小人後君子，警告政府：「議員係民意載體；（若玩嘢）你係玩市民大眾、玩晒全香港市民，到時邊個得益呢？」不排除在挑機下以對抗性衝突方法迫政府順從民意。

記者 梁穎妍

2003年首次參與區選就在「石蔭」選區當選為葵青區議員的尹兆堅，2015年以數十票之差連任失敗，2016年擔任立法會議員後自掏腰包在當區設立辦事處，繼續服務，本來今次有徒弟接棒，惟數月前對方決定不參戰，他臨陣出征，終以1,160票擊敗民建聯原區議員李世隆，事隔4年復仇成功再重奪石蔭根據地，成為「雙料議員」的他笑言自己「從未走遠。」

尹兆堅接受《蘋果》訪問時指，相信若無反政府票源，選情一定吃緊，故當選後他亦對建制派得票有相當增長保持警惕，「佢哋組織動員、資源真係好多，密密咁做組織工作」，社工出身的尹指，90年代組織動員是民主派強項，「唔知係咪通訊方式改變？通訊好多喺網上，但（民主派）地區組織、同群眾去傾潮流（話題），似乎有啲退潮，我諗網上同現實世界組織要重新推動」，期望鞏固今次為民主理念、支持公義而站出來投票的市民，「同時要喺地區工作、喺實質政治工作，壓過建制派」。

訪問在石蔭梨木道公園進行，在石蔭「起家」的尹談起古早式「抗爭」笑咪咪：「當時要求落實（興建）公園，政府部門遲遲唔肯、（前特首）董生唔理，我就收集區內一萬八千個簽名，喺fax（傳真）機年代，商議用fax方法將民意傳過去，將（文件）頭尾黐住，係個loop（循環）嚟，無限咁loop，收fax嗰個咪大劑」，「（結果）由開頭搵佢唔回應，到後來打嚟話『收到啦，你唔好fax過嚟，不如開次會傾』。」他相信「雙料議員」身份及經驗讓他更有效動員，「根據而家街坊嗰種關注程度，（動員）難處一定有，但有信心」，若政府拒絕回應地區要求，隨時在區內產生小海嘯。

本身已在立法會作為少數派，當然深知成為多數的作用，但尹認為區議會始終僅屬諮詢架構，動議並無約束力，「法律上佢冇『我話咗你就做』呢樣嘢（實權），同市政局相差好遠」，所以全港17區由民主派主導都未算真正執政，「視乎政府部門係咪公道揸正章做嘢，尊重區議會」，但當然不代表民主派會一事無成，「（區選大勝）總體係覺得市民覺醒咗，我覺得係全香港人包括所有政黨都覺醒咗」，認為區議會將成政治角力場，「以前（做）區議會都會咁諗，做區就係做區，字眼叫做區，係個區入面嘅嘢，交通、衞生環境我做好呢啲就得，好明顯呢場運動話畀大家聽：係唔得囉。」

他透露11月底葵青區民主派候任議員已踫頭商議，「我哋已經傾緊第一次區議會開會，如何反映今次市民大眾就政府失職、警暴（的意見）」，並要將市政民主化，「過去長久以來區議會都被矮化，變成部門嘅附屬，埋嚟問你意見，啱聽意見就用，唔啱聽嘅意見睬你都傻」，強調要提升政策倡議能力，「而唔係過去建制派嗰種遞信打吓卡，部門做就叫成功爭取。（政府）佢好興話技術上唔可行，我哋做埋有關政策分析、數據分析同規劃工作，我覺得係個挑戰」，勢將立法會一套搬入區議會。

尹亦大讚素人有質素、有決心，「大家各有專長，併埋一齊產生力量好大」，相信懷着謙卑態度定必可衷誠合作，因為暴政當前，一切分歧都只是雞毛蒜皮，更要在4年任期向選民證明投下信心的一票沒有白費。尹豪言民主派一定得，甚至很快有成績，「有啲可能係建制派長久落嚟懶惰唔做嘅事情，有啲規劃亦唔係上天下海起摩天大廈。」但他不認為會順風順水，因政府或出茅招，強調若遇挑機，「我哋喺無辦法之下，只能用更對抗性衝突方法迫使佢哋順從民意。」時移世易，區議會也是民生、政治，缺一不可。

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
無懼警暴 學懂自救
《抗暴之戰●法例須知》讀果 上架
-----------------------------
【撐學生】
召集有心人 撐學生全年睇《蘋果》
立即按此