只得20歲嘅NMB48成員須藤凜凜花，喺上星期舉行嘅「第9屆AKB人氣總選」上驚爆結婚成為熱話，唔止令傾家蕩產為佢投票嘅男fans大受打擊，好多圈中人都將呢件事作為討論議題，令入行四年嘅須藤凜凜花成為新聞人物，噚日佢現身為節目錄影，據知佢今日會正式交代婚訊。

須藤凜凜花宣佈閃婚後，雜誌《週刊文春》即爆佢犯禁拍拖，對象係一名任職醫護人員嘅圈外人，須藤凜凜花日前收工後到男友寓所過夜更被斷正，今日《週刊文春》再度爆料，揭凜凜花嘅戀情原來係媽咪一手撮合，其圈外男友本身亦係凜凜花歌迷，由於男方係凜凜花母親打工食店嘅熟客，一次派對上凜凜花跟男友得以認識，在對方力追下終於成為情侶關係。