周日（23日）沙田日賽，第六場四班1200米，「猴王駒」最近三場敗績都有藉口，大前仗外檔蝕唔起，前仗氣管多血，上仗則在直路初遲望空，撻起追勁已到終點跑第四。

試準後，大摩變招，上仗跑完安排「猴王駒」上從化，北上後一直有操，返港後連最擔心唔跳，周五（21日）都跳埋最後試跑，準備證明健康一切正常；唔等谷草，刻意轉戰田草，換蘇兆輝，抽四檔，條件足夠，馬唔叻，難得對手又唔叻，不太熱抵博。

第八場三班1200米，久休復出的「力奇先鋒」，上季初出拍住「有理共想」與「勇闖者」同到，再出輸畀「必得勝」，其後因心急求贏，跑得太密，體重持續下跌，導致不進反退。

今季此駒遲起步，純因九月尾不良於行，停操至十月中，沈集成索性安排上從化，11月中由頭來過，自此無斷兼試夠四課大閘，返港後再於周四大圈再拍多課，喜見「力奇先鋒」被廐侶「開心日子」刺激，跳來都無失控搶口夠定；結合體重止跌回升，復出跑弱組，排好檔，條件夠晒！