天后王菲結束一連三日喺台灣花蓮拍廣告工作，佢冇選擇搭飛機，反而選擇到花蓮火車站，搭上普悠瑪號返台北，其間唔少市民認出王菲，就驚呼：「真的是王菲耶﹗」記者趁機會問佢同謝霆鋒復合至今高興嗎？有冇考慮結婚可能？王菲面對記者提問都面無表情，喺保鑣簇擁下上車。

王菲喺松山火車站落車後，被媒體重重包圍，但天后不發一言，隨後坐上保姆車，而保姆車後面有6、7部採訪車追訪，而車隊一路行駛至南京東路時，保鑣的座駕仲跟小巴士擦撞，直接停下後就冇跟上，小巴上的乘客都落晒車，亦唔知道車上嘅就係王菲，王菲座駕冇因為交通意外而停低，隨後保姆車停喺一間飲品店，助手落車買咗兩杯台灣出名嘅珍珠奶茶。

記者問助手係咪王菲想飲？懷孕2個月唔係唔飲得凍飲嗎？助手都笑而不答，買完迅速上車，座駕直駛桃園機場。