蔡約翰今季減少同韋達合作，韋達哥哥損失當然好大。但對於馬迷嚟講，卻是天大喜訊。點解呀？事關韋達騎少數嘅蔡廐馬，鬥志更加鮮明，真係唔驚冇埋策騎權咩？齋講你哋可能唔信，講啲實質數據畀你聽，近六次韋達同蔡神仙合作嘅馬，包括「戰利品」一冠一亞，另外「精彩日子」贏馬，仲有「坪踪捷影」兩次跑第二。
咦！「坪踪捷影」咪就係周三晚有份上陣嘅馬，係，今次再用韋達出戰谷草1200米，又對番近兩次贏佢嘅「江山如畫」同「環保戰士」，有利嘅地方係後面一對馬都係贏完馬換人跑，跑唔跑得番上次水準，真係要跑過至知，反而「坪踪捷影」配搭不變，嗱，睇你啦，韋達！