繼限韓令之後，今個月初北京市網信辦再出招，搵過啲微博嘅狗仔隊賬戶負責人傾傾，無耐呢啲多次爆出大陸明星醜聞嘅微博，好似係全明星探、中國第一狗仔卓偉、名偵探趙五兒等等，就被指「低俗追星」，全部即時關閉。（新聞連結： http://bit.ly/2t8lvoq ）

但呢次行動，原來都有漏網之魚，早幾日就有個新嘅微博賬戶「Z探社」出現，就咁睇個「探」字，都估到十之八九同狗仔隊有關。

不過內容就輕手好多，暫時只係見到陳浩民拍古裝戲、彭于晏機場接機、李治廷喺食肆開餐等等......同以前影到白百何喺泳池同小鮮肉戲水、劉愷威上酒店房同女星對劇本呢類內容，真係天壤之別。

唔知呢個Z探社係咪想由淺入深，挑戰北京市網信辦嘅底線。而之前被關閉咗嘅「名偵探趙五兒」，就以「名偵探趙五兒工作室」賬戶借屍還魂，以轉發Z探社嘅報道嚟繼續運作。