中國財險（2328）停牌半日，原來係公佈由去年7月至今年6月底止有關的「交強險專題財務報告」，期內交強險累計虧損10.37億元人民幣。出現咁嘅消息，大概都知中財險下午復牌會插居多。星俠事前並不知道中財險會公佈有關數據，故入市決定並非失策，只可以話十分唔好彩。
不過可以肯定，類似的唔好彩唔會成日出現，而且有一點要留意，由於該份財務報告並非按照香港財務報告準則和香港公認的會計原則編製，所以如果用另一會計手法計過盤數，結果或有不同。不過跌就跌啦，無謂拗咯。中財險股價受消息拖累，下跌難免，不過總算能於12元以上收市，跌幅只是一般，後市若見失守昨日低位11.42元才考慮止蝕，首站目標價15.6元不變。

股價有力見10元

幾隻內地百貨股昨日勁升，可留意新世界百貨（825）。該股今年7月上市，早前公佈全年純利急升92%逾3億元，比市場預期更好。集團去年同期銷售增長逾16.5%，與百盛（3368）的17.1%差不多，後者股價昨日一度升見90.7元，但尾市大幅回吐，僅以82.5元收市。
新百貨位於南京首家百貨店已經試業，連同明年武漢及北京的新店，總數將達33家。集團有38%樓面租自同系公司，成本控制理想，預期未來盈利增長空間不俗，股價升見10元不難。