韓國天團BIGBANG前成員勝利有份投資的夜店Burning Sun，去年11月爆出暴力事件，之後接連爆出性騷擾、性暴力、性交易及毒品的爭議，更引發連串風波，其手機的聊天內容曝光，勝利被踢爆涉性招待海外投資商及涉逃稅，他於本月11日宣佈退出娛樂圈。

SBS招牌時事節目《想知道真相》昨晚播出關於Burning Sun的專題報道，據悉《想知道真相》製作組事先收到超過350多個舉報，並經過3個月的採訪而完成相關專題報道。節目中訪問了一名曾光顧Burning Sun的舉報者，該女子更親眼目擊有女子於夜店內被性侵：「有個年輕男子問我要唔要跟佢去房飲酒，我都飲醉咗所以就跟過去，一入房就見到一名無咗意識嘅女仔瞓咗喺沙發上，有一個男人騎喺佢身上，並將臉埋喺女生嘅胸部，雖然佢主張女子係佢女友，但我見到之後覺得好驚。」

目擊者續指：「我立即就報警揭發事件，但兩小時後突然有警察打電話嚟，問『係咪你報警？』當時我已經返咗屋企，係見到該名女子毫無意識先報警，基本上好似死屍一樣。警方話係有人打119（火災救助）通知佢哋，但我打嘅明明係112（緊急報警求助）。」令人質疑是否夜店買通警方。

勝利之前被爆曾於兩年前在菲律賓開豪華派對，當時招待1名來自台灣的VIP「林太太」，據知「林太太」是Burning Sun的重要投資者。《想知道真相》亦揭發「林太太」的身份，一名匿名受訪人士透露：「聽講林太太係個超級大人物，佢仲會請埋隔離檯飲酒，話自己老公喺台灣係總理級（即內閣高官），唔方便透露名字，但級別真係好大，係連黑社會大佬都要聽佢講嘅程度。」

節目又訪問了一名Burning Sun前職員，指「林太太」都是透過其經理人用華僑男性的名字來預約，一晚就可以在店內花費2億韓圜（約138萬港元），所以節目組推測林太太投資Burning Sun的金錢來源自黑社會。

雖然捲入是非，但勝利就兩度受訪喊冤，而《想知道真相》昨晚亦公開勝利傳給節目組的短訊，勝利寫道：「我認為今次事件係由犯罪點燃嘅罪刑，喺未經許可就公開他人私人手機嘅內容，並將事件包裝成『公益舉報』，引導輿論發展。一名不具名律師喺採訪中話佢係向國民權益委員會舉報，但國民權益委員會明明應該係保護舉報者嘅地方，但舉報者卻出面接受訪問。另外，娛樂版嘅記者都上晒SBS主要嘅新聞節目，又冇揭露資料出處，為咗出名就報道尚未確認真偽嘅事。」勝利的發言令網民大感無言，紛紛鬧爆他沒有為事件反省。

-----------------------------
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
星期一至五晚上10點半
《動腦Q》Let's Q the money！
http://bit.ly/2QW8LcI