作為建制派一分子，自由黨喺政改表決中坐定定投票，盡顯神一般表現，有政界中人仲大讚身為該黨主席嘅鍾國斌Felix，總算為個黨做咗個明智決定，難怪經此一役後，呢位立法會方中信嘅自信心，好似顯著上升。
好似表決後幾日咁吖，非牟利時裝組織Fashion Farm Foundation就搵咗身為Friday Ambassador嘅佢影咗輯硬照，宣傳逢周五着香港設計服飾。屬紡織界議員嘅Felix，當日着住Harrison Wong設計嘅黑色網布外套，大會形容佢「keep住政壇『方中信』的魅力，同時不失政客的威嚴」。據聞佢喺現場風騷擺chok甫士，似乎都有轉行做model嘅潛質。

齊昕Tanya做model

主辦單位亦同時上載其他大使梁齊昕嘅硬照，相中嘅齊昕着上R1476嘅玩味設計，以及Kay Li出品嘅白色恤衫，笑得非常燦爛，被形容「香港第一女兒，同樣支持香港時裝」。公民黨陳淑莊Tanya則以kenaxleung秋冬系列嘅拼布連身裙，展現罕有嘅嫵媚。唔知梁齊昕同陳淑莊，幾時同呢位立會男模出騷？