單親媽咪楊思琦傳秘交已婚股壇猛人兼框架音樂老闆高健行（Peter）一年，最近思琦連買兩個總值2,000萬元的天晉單位，又換新車兼請司機接囡囡Krystal返學。
思琦昨日在電話中否認新戀情，她表示透過朋友介紹認識Peter，但不識對方太太，可擔心影響對方家庭？她無奈說：「咁有冇人擔心影響我？咁俾人寫，人哋以為我唔使做呀。」怕嚇退追求者？她說：「我諗咁寫出嚟，真係冇人敢追我囉。」

問她買新樓投資？思琦說：「唔係我名下，屋企人買。」她自言仍需努力賺錢養家，月初她返佛山出席活動，順道宣傳與李逸朗（Don）合唱新歌《黑眼圈》，問Don可有唱哭腔？思琦說：「好正常，呢首係情歌，係Don搵我合作，登台都想有自己歌。」
採訪：嵐山