一場足球比賽踢90分鐘，就已經深入民心，不過國際足協就研究，因為比賽唔停表，搞到過程有大量執波、球員受傷等浪費時間嘅場面，搞到比賽悶晒，國際足協理事會就討論緊一個新改革，就係改踢60分鐘，但比賽中斷就會停表，令比賽更加緊湊。

新改革就建議上下半場各踢30分鐘，亦好似籃球比賽咁搞停表制，比賽一旦中斷，好似出界、換人、球員受傷等都停表，比賽時間雖然短咗，但應該會更加緊湊。身為理事會一員嘅前意大利國腳蘇拿，亦都贊成呢個改革。不過咁，以國際足協嘅改革步伐，連視象協助執法都講十年八載，60分鐘一場波，應該起碼幾年後先會試行。