前黎明嫂樂基兒（Gaile）早排留喺香港，同周秀娜、鄧麗欣為電影《女士復仇》開工，片中飾演打女嘅Gaile，造型似足《盜墓者羅拉》入面安琪蓮娜祖莉。日前套戲終於煞科，Gaile亦飛咗返美國三藩市陪屋企人。

今日正日生日嘅Gaile，踏入生日凌晨，Gaile嘅爸爸媽媽、妹妹同男友Ian就為睡床上嘅佢送上驚喜！已經着晒睡衣上咗床嘅Gaile突然俾屋企人嘈醒，原來佢哋準備好蛋糕、紅色氫氣球同禮物，為壽星女慶祝，Gaile啱啱就喺Instagram度貼咗相片。

屋企人突然喺睡房出現，捧個surprise birthday cake已經夠surprise，仲附加一大堆生日氫氣球，童真到暈！Gaile留言話：「我多麼的幸運，這是一個精彩的開始，期待我參予的新電影及跟我的新經理人公司Style合作。」

80年出世，今年Gaile已經36歲，不過喺父母或男友眼中，Gaile無論幾多歲，都肯肯定仲係一個大細路！