【新增回應】

阿旺、唐立信、吳嘉儀……52歲郭晉安喺大台有啲收視保證，最近佢有份演嘅《致命復活》，雖然有網民覺得有啲劇情係抄《原罪犯》、《復仇勇者》、《金田一》、《劫後重生》，綜合抄足多套戲，不過大台劇就一向係咁……

郭晉安喺劇中要扮野人就有啲慘嘅，扮吞蛇同青蛙，今日有周刊話郭晉安咁搏命都係為咗賺奶粉錢，與老婆歐倩怡育有一仔一女，不過近日見歐倩怡行街肚凸，被指疑似有咗5個月，日前更被影到疑似大肚嘅36歲歐倩怡(Cindy)同囡囡Blair去西貢公園玩，玩一陣已經好易攰，惟有睇住囡囡玩，玩完就同囡囡去買雪糕，歐倩怡冇食生冷嘢。

據周刊指，郭晉安近日拍緊《老表，畢業了》，照顧仔女重任交咗畀歐倩怡，不過郭晉安唔使開工，都會抽時間陪小朋友，二人結婚多年，郭晉安都賺唔少，而歐倩怡亦淡出娛圈，但係報道就爆郭晉安唔多過錢喺老婆手，主力用啲錢嚟投資，目前已有5個物業，身家超過7千萬，啲物業都冇落老婆個名，據知係郭晉安家姐反對啲物業加名，不過2012年，郭晉安都送咗一架50幾萬嘅寶馬畀老婆揸。

周刊都有問過郭晉安，佢就否認太太有咗，暫時冇計劃生多一個，仲話有會通知，多謝關心。

而Cindy今日接受《蘋果》電話訪問就否認話﹕「梗係唔係啦！我唔再生嘞，我唔肯生！(老公想生？)佢又冇講，依家兩個啱啱好，每日要接仔女返學放學，都冇晒私人時間。」被指肚凸凸，Cindy都好無奈﹕「可能係韓國衫啲Cutting啦，我乘機有藉口掉晒批衫，哈哈，其實我每日都有跑步，但脊骨一直有啲事，連睇醫生時間都冇。」