新世界中國（917）有中期靚仔業績墊底，NAV折讓仲係好吸引，新中唔怕買。新中啱啱公佈2010年度半年度（6月年結）業績，純利急升1.5倍，到9.4億銀。集團食住祖國樓市回暖個勢，單係半年度間，已簽訂物業合約銷售額大增4倍，到55億銀人仔，而半年度落實入賬銷售額，不過25億港銀。集團預售銷情理想，保障嚟緊下半年度，同打後嘅財政年度繼續大豐收。真係好保守計數，新中2010年度純利只係翻半番到20億銀，連供股攤薄效應反映嘅預期PE，都係得7.5倍單位數。
再講，新中連重秤前NAV折讓，高達55%，近磅市值內房股，PB起碼一兩倍，講折讓，新中吸引力彈出嚟。呢轉博新中折讓係咁易收窄到40%，現價2.83元講緊要升30%。

中國林大（910）啱啱喺上月尾EGM，通過出售雲南省部份林木資產。呢壇交易，可以為林大獲利9億銀，相當於每股0.11元，林大現價都係得0.31元，入賬反映，PE得兩倍幾。又連埋呢壇交易獲利增值計，林大NAV上到1蚊，現價折讓69%，集團應該係市場裏面，折讓最大嘅林木業股份。呢轉短打，博林大升20%到0.37元，真係未有耐上到NAV水位。

錢雋