韓國演藝界出名多靚仔靚女，雖然唔少人就質疑佢哋後天加工，不過有時候遺傳嘅嘢真係好難靠後天加工就得。

好似男團2PM嘅Nichkhun，佢本身係中泰混血兒，出名靚仔一名，擁有唔少女粉絲，而Nichkhun咁靚仔可以話係盡得遺傳因子，就連佢兩個妹妹都同哥哥一樣係索女一名，而且佢同兩個妹妹感情好好，成日都會喺節目上提起對方，當中最細嘅妹妹Sherleen近年亦進入娛樂圈，佢生得亭亭玉立，完全同佢哥哥一樣食呢行飯。

至於另一男團SuperJunior嘅崔始源同樣出名係靚仔一名，而且佢本身有家底，完全係高富帥一名，佢同Nichkhun一樣同自己個妹妹感情好好，成日喺節目上稱讚妹妹讀書好叻，又成日上載同妹妹嘅照片上網，最搞笑呢位嘮叨哥哥會喺妹妹個Instagram留言叫佢快啲瞓覺，笑死粉絲。而佢妹妹同始源一樣都係鼻高高，同埋擁有大眼睛，佢妹妹仲因為哥哥關係同SJ各成員都好老友，早前SJ喺首爾開騷，始源妹妹仲因為同哥哥個緋聞女友劉雯合照而搞到哥哥傳出好事近呢。

而女團方面，少女時代嘅成員泰妍屋企就有妹妹同哥哥，不過佢唔想屋企人成為焦點，所以平日對於屋企人都表現好低調，就連Instagram佢都好避忌唔會follow哥哥同妹妹嘅帳號，以免將家人曝光，不過泰妍就曾經喺節目內提到佢哥哥同佢個樣都好似，又讚哥哥生得好靚仔，而泰妍亦都試過喺網上上載過哥哥彈結他嘅靚仔樣，因而惹嚟粉絲關注。