當年今日

留港讀書 家長得益 - 左丁山

蘋果日報 2004/10/26 00:00


自三三四學制諮詢文件出籠之後,唔少教育界人士紛紛發表意見。處境最艱難嘅一位,可能係代表教協嘅議員張文光。張議員受過大學四年制嘅好處,堅定支持三三四學制,任佢點擺軚,佢都唔敢違背自己嘅良心原則,話五二三好過三三四,之不過身為議員,已是人在江湖,不得不順從一啲(部份)選民(教協會員、教師也)嘅意見,諗啲理由出來嘈一輪,問心嗰句,如果教協最後唔支持三三四,或者因技術理由又將三三四拖慢十年,張文光就真係有愧於香港。
教育界人士理論上應該讀過好多書,明白事理至啱,但一啲人似乎為反對而反對,自暴其短。例如《蘋果》十月二十三日報道,香港教育政策關注社主席張民炳指出,教統局應審慎檢討課改進度,否則會逼使家長提早把子女送到外國升學。
張先生應該知道,呢十年來已經有好多好多家長將啲子女提前送去外國讀書,去外國讀初中三、高中一嘅細路,數目數不勝數,點解要咁早去?咪係怕咗香港啲學校、老師、課程、學制囉,如果唔撥亂反正,推行三三四,改革課程,香港啲學校只會留番畀啲清貧學生讀,張民炳唔好倒果為因。
一啲人話第日大學加學費至五萬銀一年,太貴喎。去外國讀大學就真係貴嘞,呢晚食飯坐在S哥隔籬,S哥兩公婆有高薪厚職,送個仔去美國一啲都唔難。至於錢呢?襟計咯,入讀著名私立大學,S哥話一個月磅水四皮(四萬),有少冇多,等於供多一層中價單位。投資於仔女,不望回報,買多層樓,可能退休之後生活更有保障,如果香港學制,課程搞好啲,香港家長更加富有!